Leikkonan Nicole Kidman segist ekki hafa vitað af áformum dóttur sinnar Isabellu Cruise, en hún giftist unnusta sínum Max Parker við leynilega athöfn fyrr í þessum mánuði. Kidman er engu að síður glöð að dóttir hennar hafi fundið ástina og sé hamingjusöm.
Áður hafði verið greint frá því að Kidman hefði hjálpað dóttur sinni að skipuleggja brúðkaupið, en sá orðrómur reyndist ekki réttur ef marka má heimildarmann tímaritsins People.
Giftingin fór fram á Dorchester-hótelinu í London, og var aðeins nánustu vinum boðið. Hvorki bróðir Isabellu, Connor, né foreldrar þeirra voru því viðstödd við athöfnina.
Faðir brúðarinnar, Tom Cruise, er þó sagður hafa borgað brúsann.