Gamanleikarinn Tracy Morgan var gestgjafinn í þætti Saturday Night Live í nótt. Morgan talaði þar um bílslysið sem hann lenti í á síðasta ári og fullyrti að hann hefði aldrei gengið heill til skógar og trúlega væri hann skarpari eftir slysið ef eitthvað væri.
Morgan kom nýverið í fyrsta sinn fram opinberlega eftir að hafa hlotið heilaskaða og beinbrot í slysinu. Hann var í dái í tvær vikur og tvísýnt var um hvort hann lifði það af og hvernig ástand hans væri eftir það. Vinur hans, grínistinn James McNair, lét lífið í slysinu þegar vörubifreið ók aftan á bifreið sem þeir voru farþegar í.
„Slysið var hræðilegt en það sýndi mér þó hvað ég nýt í raun mikils stuðnings og umhyggju,“ sagði Morgan í upphafsræðu þáttarins. Tina Fey og Alec Baldwin, samleikarar hans í 30 Rock-þáttunum, komu einnig fram í þættinum og léku í atriði þar sem Tracy Jordan, karakter hans úr 30 Rock, lendir í lífshættu.