Kynlífsmyndband með Sheen dúkkar upp

Fjölmiðlafárinu í kringum Charlie Sheen virðist hvergi nærri lokið. Fyrr í mánuðinum greindi leikarinn frá því að hann væri smitaður af HIV, en fréttirnar settu slúðurmiðla á hliðina.

Sheen heldur því fram að hann hafi ómögulega getað smitað nokkurn mann, en hann segist ekki hafa stundað óvarið kynlíf síðan hann fékk greininguna. Enn fremur segist hann hafa sagt  öllum bólfélögum sínum frá smitinu.

Fjöldi bólfélaga hans hefur þó komið fram og sagt yfirlýsingu hans ekki eiga við rök að styðjast og að leikarinn hafi alls ekki greint frá ástandi sínu. Sheen hefur í gegnum tíðina stært sig af því að hafa sængað hjá þúsundum kvenna.

Nú keppast fjölmiðlar við að segja frá myndbandi sem sýnir Sheen og annan karlmann neyta eiturlyfja og stunda kynlíf. Fyrst var greint frá myndbandinu af Radar Online, en síðan hafa miðlar á borð við Daily Mail, Daily Mirror og fleiri einnig greint frá málinu.

Radar Online heldur því fram að myndbandið sé eitt sönnunargagna í gömlu máli gegn Sheen, þar sem hann var sakaður um að hafa vísvitandi smitað bólfélaga sinn af kynfæraáblæstri. Sheen er sagður hafa gengið frá málinu með því að greiða manninum sem um ræðir háar miskabætur.

Myndbandið sem um ræðir er sagt vera frá árinu 2011, sama ári og leikarinn var greindur með HIV.

Frétt mbl.is: Tilboðum rignir yfir Sheen

Frétt mbl.is: Lét bólfélagana skrifa undir þagnareið

• Blogga um frétt