Þær Viktoría krónprinsessa og Sofia prinsessa, eiginkona Carls Philips Svíaprins, vöktu mikla athygli þegar þær komu ásamt eiginmönnum sínum til hátíðarkvöldverðar í sænsku konungshöllinni í gær.
Viktoría og eiginmaður hennar, Daníel eiga von á sínu öðru barni í næsta mánuði en Sofia og Carl Philip eiga von á sínu fyrsta barni í apríl.
Öll konungsfjölskyldan, fyrir utan Madeleine prinsessu og eiginmann hennar, Chris O'Neill, var við kvöldverðinn en Madeleine og O'Neill eru búsett í London og áttu ekki heimagengt. Þetta er fyrsta formlega kvöldverðarboðið í konungshöllinni í ár en meðal gesta voru þingmenn, sænska ríkisstjórnin, sendiherrar og fólk úr viðskiptalífinu.
Slúðurmiðlar hafa fylgst grannt með stækkandi kúlu Viktoríu og hefur hún ítrekað verið spurð um hvort hún gangi með tvíbura en hún neitar að svo sé. Eins hefur hún ekki viljað upplýsa um hvort Estelle, fjögurra ára, eigi von á litlum bróður eða systur. Svaraði hún spurningum fréttamanna í fyrra á þá leið að Estelle langi mest í hamstur.
Hér er hægt að lesa nánar um boðið, til að mynda matseðilinn og skoða fleiri myndir.