Man ekki eftir eigin brúðkaupi

Fyrrverandi fyrirsætan Katie Price, einnig þekkt sem Jordan, greindi frá því á dögunum að hún myndi ekki eftir eigin brúðkaupi.

Price, sem þrisvar hefur gengið í það heilaga, gekk að eiga söngvarann Peter André árið 2005. Brúðkaupið, sem var heldur stórbrotið, fór fram í Highclare-kastalanum þar sem þættirnir Downton Abbey voru teknir upp.

„Ég hef gift mig þrisvar og þetta hafa allt verið mjög ólík brúðkaup. Eitt var haldið erlendis, eitt var í Vegas og svo brúðkaup mitt og Pete sem haldið var þar sem Downton Abbey var tekið upp.“

Price segist þó lítið muna eftir brúðkaupinu, enda hafi hún ekki verið í andlegu jafnvægi.

„Ég þjáðist af mjög slæmu fæðingarþunglyndi og var ekki á þunglyndislyfjum þannig að þetta er eiginlega allt í móðu."

Price segist harma það að muna ekki betur eftir stóra deginum enda hafi henni þótt þetta ævintýralegt brúðkaup, til að mynda var hestvagn brúðhjónanna í líki graskers.

Price og André skildu fjórum árum síðar, en í dag er hún gift Kieran Hayler.

Frétt Daily Mail

• Blogga um frétt