Jude Law er nýtt andlit bílaframleiðandans Lexus. Það þarf því kannski ekki að undra að hann hafi leitað á náðir fyrirtækisins þegar hann fann gjöf fyrir kærustuna, sálfræðinginn Philippu Coan, á dögunum.
Law og Coan hafa farið afar leynt með samband sitt, en þau byrjuðu að slá sér upp í maí á síðasta ári.
Haft var eftir ónefndum heimildarmanni Daily Mail að Law væri frá sér numinn af vitsmunum Coan og væri staðráðinn í því að klúðra sambandinu ekki. Þá á hann að hafa greint frá því hversu hressandi það er að eiga í sambandi við konu sem er ekki viðriðin skemmtanabransann.
Jude Law skildi við Sadie Frost, eiginkonu hans til sex ára, árið 2003 en saman eiga þau þrjú börn. Þá á hann einnig tvö börn sem komu í heiminn eftir að hjónabandi hans og Frost lauk.