Bandaríski tónlistarmaðurinn Casey Dienel, sem kemur fram undir nafninu White Hinterland, hefur kært kanadíska poppstirnið Justin Bieber fyrir hugverkastuld. Dienel heldur því fram að Bieber hafi stolið raddstefi frá sér og notað í laginu Sorry.
Fram kemur í frétt AFP að Dienel fari fram á umtalsverðan hlut í hagnaðinum af laginu og vilji að dómstólar úrskurði hvað henni beri. Raddstefið er að mati Dienel tekið úr lagi á plötu hennar Baby frá 2014. Plata Biebers með Sorry kom hins vegar út í nóvember.