Leikkonan Emilia Clarke, sem líklega er þekktust fyrir að túlka drekamóðurina sjálfa í Game of Thrones, segist gjarnan vilja leika Jane Bond.
Þá segist hún líka ekki eiga í erfiðleikum með að nefna hinn fullkomna mótleikara.
„Ég á mér fullt af draumum. Ég myndi gjarnan vilja leika Jane Bond. Fullkominn mótleikari væri síðan Leonardo DiCaprio. Á því væri enginn vafi,“ sagði leikkonan í viðtali við Daily Star.
Ef hugmyndir leikkonurnar yrðu að veruleika yrði DiCaprio fyrsti Bond-gæinn. Fjölmargar leikkonur hafa hingað til farið með hlutverk ástkvenna njósnara 007, og eru þær jafnan kallaðar Bond-stúlkur. Ólíklegt verður þó að teljast að njósnari hennar hátignar verði leikinn af konu í bráð.
Miklar vangaveltur hafa verið um hver taki við af Daniel Craig, sem hefur farið með hlutverk Bonds síðustu árin. Margir leikarar hafa verið nefndir í því samhengi, til að mynda Tom Hiddleston, Tom Hardy og Idris Elba.