Alvarleiki virðist vera að færast í samband Taylor Swift og Tom Hiddleston þar sem parið flaug til Suffolk í Englandi í gær til að hitta foreldra Hiddleston. Á fimmtudag hittu þau foreldra Swift í Nashville og hafa þar með bæði hitt nýja tengdaforeldra sína.
Í frétt Hollywood Life kemur fram að parið hafi flogið með einkaþotu Swift til Englands. Miðillinn virðist hafa fylgst vel með hverju skrefi þar sem fram kemur í fréttinni að móðir Hiddleston hafi tekið vel á móti nýrri tengdadóttur og knúsað þau bæði þéttingsfast.
Hiddleston sýndi Swift æskuslóðirnar og fór með hana í bíltúr á gamalli Jagúar-bifreið um svæðið.