Í byrjun mánaðarins var sett upp í Ástralíu sýning helguð síðustu breiðskífu Bjarkar Guðmundsdóttur, Vulnicura. Á sýningunni, sem nefnist Björk Digital, bauð hún gestum að stíga inn í sýndarveruleika sem byggist á Vulnicura.
Nú hefur sýningin verið sett upp í Tókýó og af því tilefni flytur Björk lagið Quicksand af Vulnicura í beinni sýndarveruleikaútsendingu á netinu, en samkvæmt tilkynningu frá aðstandendum útsendingarinnar, Mirakan vísinda- og nýsköpunarsafninu, verður þetta í fyrsta sinn sem slíkur 360 gráðu sýndarveruleikaviðburður er sendur út á netinu.
Björk klæðist sérstakri þrívíddarprentaðri grímu við flutninginn sem er úr smiðju sérfræðinga MIT-háskólans vestan hafs.
Hægt er að sjá útsendinguna hér.