Paul Gascoigne þarf að mæta fyrir dómstóla í Bretlandi í september út af ákæru vegna ummæla sem hann viðhafði í nóvember á síðasta ári.
Á sýningunni sinni An Evening With Gazza í Wolverhampton í fyrra, á hann að hafa hreytt kynþáttaníði að dyraverði sem starfaði á skemmtistaðnum þar sem sýningin fór fram.
Gascoigne mætti til skýrslutöku í Dudley Magistrates Court í dag þar sem hann sagðist vera saklaus af ákærunni. Fer því fram dómsmál og hefst aðalmeðferðin hinn 19. september.
Gascoigne er fyrrverandi leikmaður meðal annars Tottenham og Lazio. Hann hefur í mörg ár glímt við eiturlyfja- og áfengisfíkn.