Fjölmargir komu saman í Borgarvirki á Vatnsnesi í gærkvöldi og hlýddu á tónleika Sigríðar Thorlacius. Tónleikarnir voru einn af hápunktum bæjarhátíðarinnar Eldur í Húnaþingi sem fram fer nú um helgina.
Hin sérstæða klettaborg í Vesturhópi þótti frábær tónleikastaður og hljómburður þar eins og best gerist. Ljósmyndari mbl.is var á staðnum og fangaði stemninguna.
Opnunarhátíð hátíðarinnar var á fimmtudag og hefur síðan þá hver atburðurinn rekið annan.
„Ljósið er þema hátíðarinnar að þessu sinni,“ sagði Sólrún Guðfinna Rafnsdóttir í samtali við mbl.is í gær en þau Mikael Þór Björnsson, eiginmaður hennar, eru framkvæmdastjórar þessarar bæjargleði.
„Við hvetjum fólk til þess að setja upp fallegar ljósaskreytingar við heimili sitt; útikerti, seríur, kyndla og annað. Slíkt myndi setja fallegan svip á sumarkvöldið nú þegar aðeins er farið að húma.“
Frétt mbl.is: Eldur í Borgarvirki