Óskarsverðlaunaleikkonan Brie Larson verður fyrsta konan til að leika aðalhlutverk í kvikmynd um ofurhetjuheim Marvel. Þetta var staðfest, eftir þrálátan orðróm, á Comic Con-ráðstefnunni í dag. Larson, sem er 26 ára, mun leika Carol Danvers sem einnig er þekkt sem Captain Marvel. Persónan hefur verið hluti af Marvel-heiminum frá árinu 1968 og tekið á sig ýmsar myndir en Danvers hefur haldið þeim titli frá 2012.
Myndin mun koma út í mars 2019 en fyrst var tilkynnt um gerð hennar árið 2014. Þá staðfestu stjórnendur Marvel-kvikmyndaversins að aðalhlutverkið yrði leikið af konu. „Captain Marvel hefur gengið undir mörgum nöfnum í teiknimyndasögunum og hefur átt margar manneskjur sem hafa verið í búningnum og notað þann valdagrunn,“ sagði framkvæmdastjóri kvikmyndaversins, Kevin Feige, á þeim tíma. „Ég vil gera þetta mjög skýrt: Þessi hetja heitir Carol Danvers.“
Allt ætlaði um koll að keyra þegar Feige kynnti Larson sem Captain Marvel eins og sjá má í myndskeiðinu hér að neðan.
Watch the Hall H crowd freak out as @brielarson is announced as #CaptainMarvel pic.twitter.com/fDMvgLA1ym
— Fandango (@Fandango) July 24, 2016