Tekur upp myndband á Mýrarboltanum

Tónlistarmaðurinn Steinar hefur sent frá sér nýjan sumarsmell með titlinum „Young“. Steinar var í góðum félagsskap við gerð lagsins því rapparinn Stony, sem getið hefur sér gott orð síðustu misseri, flytur lagið með honum. Hér er hægt að hlusta á lagið á Spotify.

„Ég held að þetta lag hafi mikinn „potential“,“ segir Steinar í samtali við mbl.is.

„Ég er að henda því út núna rétt fyrir versló til að fólk geti keyrt lagið í gang um helgina.“

Steinar situr ekki auðum höndum yfir helgina heldur „drullar sér vestur“ og spilar á Mýrarboltanum á föstudaginn með hljómsveit.

Hann kemur fram á skemmtistaðnum Edinborg þar sem Blaz Roca og Aron Can munu einnig stíga á svið og er að auki búinn að fá með sér kvikmyndagerðarmann sem mun fylgja hljómsveitinni eftir og taka upp myndband fyrir lagið á Mýrarboltanum.