Jennifer Lawrence var tekjuhæsta leikkona heims síðustu 12 mánuði samkvæmt lista Forbes. Námu tekjur hennar 46 milljónum Bandaríkjadala, en þær þénaði hún meðal annars fyrir síðustu myndina í Hungurleika-seríunni. Upphæðin jafngildir 5,3 milljörðum króna.
Hin 26 ára gamla Lawrence var þó nokkuð tekjuhærri en sú sem vermir annað sætið, hin bráðfyndna Melissa McCarthy. Tekjur hennar námu 33 milljónum dala.
Þess ber að geta að um er að ræða tekjur fyrir skatt og önnur gjöld.
Heildarlisti Forbes verður birtur á fimmtudag og þrátt fyrir að frægðarsól margra leikkvenna skíni nú skærar en nokkru sinni fyrr má gera ráð fyrir að fáar þeirra narti í hæla karlkyns kollega sinna.
Launamisrétti meðal Hollywood-leikara komst í hámæli 2014 þegar tölvupóstum Sony Pictures Entertainment var lekið en athyglin beindist þá einmitt að fyrrnefndri Lawrence. Í ljós kom að hún hafði fengið minna greitt en karlkyns samleikarar hennar í American Hustle, jafnvel þótt hún væri engu minni stjarna en þeir, síður en svo.
Aðrar leikkonur á lista Forbes eru Scarlett Johansson sem situr í þriðja sæti með 25 milljónir dala en fjórða sætið vermir Jennifer Aniston með 21 milljón dala. Meirihluta tekna Aniston má rekja til ábatasamra auglýsingasamninga.
Á topp tíu listanum er að finna tvær leikkonur sem starfa utan Hollywood, þær Fan Bingbing frá Kína og hina indversku Deepika Padukone.