Martin Shkreli hefði betur látið það ógert að hreyta hómófóbískum ummælum í spjallþáttastjórnandann Stephen Colbert á Twitter. Colbert hafði gert grín að Shkreli sem komst í heimsfréttirnar fyrir að hækka verð á HIV-lyfi um 5.000% en svar hans á Twitter þótti spæla Shkreli endanlega.
Shkreli eignaðist hatursmenn um allan heim þegar hann eignaðist lyfjafyrirtækið Turing Pharmaceuticals og hækkaði verðið á lyfinu Daraprim um 5.000% í einu vetfangi. Hann var síðar handtekinn, grunaður um fjársvik.
Sambærilegt mál hefur verið til umfjöllunar undanfarna viku eftir að sagt var frá því að fyrirtækið Mylan hefði hækkað verð á neyðarpennanum Epi-pen gegn ofnæmisviðbrögðum um 400% á fimm árum. Colbert gerði stólpagrín að fyrirtækinu í þætti sínum í vikunni og rifjaði í leiðinni upp mál Shkreli.
„Þarna skall hurð nærri hælum. Ég er með bráðaofnæmi fyrir drullusokkum,“ sagði Colbert og sprautaði sig með Epi-penna eftir að mynd af Shkreli var birt á skjánum.
Shkreli virðist ekki hafa haft húmor fyrir gríninu því hann deildi mynd af því á Twitter með kaldhæðinni spurningu sem virtist beint að Colbert um hvort hann myndi veita Shkreli munnmök.
Suck a dick? https://t.co/yA7DPvnRC4
— Martin Shkreli (@MartinShkreli) August 27, 2016
Hann hefur vísast ekki gert ráð fyrir því að Colbert myndi svara fyrir sig en það gerði hann skömmu síðar á Twitter.
„Það veltur á ýmsu. Hvað leggurðu mikið á það?“ var svar spjallþáttastjórnandans.
Depends, how much are you marking them up? https://t.co/tWMc3aRvVy
— Stephen Colbert (@StephenAtHome) August 27, 2016