Stórleikarinn Ben Affleck greindi frá því á dögunum að ferðinni væri heitið til Íslands, þar sem ætlunin er að taka upp atriði fyrir kvikmyndina Justice League.
Líkt og fram kemur í frétt Vísis fara tökur fram í Djúpavík á Ströndum, en fyrir helgi mátti þar sjá hjólhýsi í tugatali sem ætluð eru tökuliði og leikurum.
Þá greindi Affleck frá því í spjallþættinum Live With Kelly að hann myndi dvelja nokkra daga á Íslandi, en fram að því hafði leikarinn dvalið í fjóra mánuði í London við tökur.
Justice League verður frumsýnd í desember en fjöldi stórstjarna fer með hlutverk í kvikmyndinni, til að mynda Jared Leto, Amber Heard, Amy Adams, Ezra Miller og Jesse Eisenberg.