Söngkonan Cher, sem er sjötug, viðurkenndi á dögunum að henni þætti erfitt að eldast.
„Ég lít í spegilinn og sé þessa gömlu konu horfa á mig, og ég hef enga hugmynd um hvernig hún komst þangað,“ sagði söngkonan í viðtali við Today.
Þá greindi söngkonan einnig frá því að tónleikaferðalagið sem hún væri að hefja yrði hennar síðasta, enda væri það nú eða aldrei.
„Ég vildi ekki leggja sönginn á hilluna, en ég vissi að þetta yrði líklega í síðasta sinn sem ég gerði þetta. Því eldri sem maður verður því erfiðara er þetta. Röddin mín er enn góð, ég er í góðu formi, get hlaupið um og ég passa enn í búningana mína. Ég hugsaði því með mér að þetta væri núna, eða aldrei.
Raunar hefur Cher nokkrum sinnum áður haldið því fram að hún væri hætt að spila á tónleikum. Til að mynda sagði hún „Farewell“-tónleikaröðina sem hún hélt árið 2002 vera sína síðustu, þá sagði hún einnig að „Dressed to Kill“-tónleikaröðin sem fór fram árið 2014 yrði sú síðasta á ferlinum.