Taylor Swift stendur í málaferlum, en árið 2013 kærði söngkonan útvarpsmanninn fyrrverandi David Mueller fyrir kynferðislega áreitni. Honum er gert að sök að hafa gripið í rass söngkonunnar eftir tónleika hennar. Mueller var í kjölfarið vikið úr starfi og kærði hann því söngkonuna fyrir falskar sakargiftir.
Á dögunum var vitnisburður söngkonunnar gerður opinber, en hún bar vitni í sumar og var beðin að lýsa atvikinu.
„Þegar við vorum að stilla okkur upp fyrir myndatökuna færði hann hönd sína upp undir kjólinn minn og greip í rasskinnina á mér. Sama hversu mikið ég færði mig var hún samt enn á sínum stað. Þetta var algerlega vísvitandi. Ég hef aldrei verið jafn viss um neitt á ævi minni,“ sagði söngkonan í vitnisburði sínum sem birtur var á vef Billboard.
„Ég minnist þess að hafa verið örvæntingarfull og miður mín, auk þess sem mér fannst á mér brotið á hátt sem ég hafði aldrei upplifað fyrr.“
Fyrr á árinu var Swift valin til að sitja í kviðdómi í Nashville, en málið sem kviðdómurinn hafði til skoðunar varðaði nauðgun og mannrán. Swift var síðan vikið úr kviðdómnum af ótta við að hún væri hlutdræg vegna eigin málaferla.
Frétt mbl.is: Swift vikið úr kviðdómi