Sænska diskóhljómsveitin ABBA hefur tilkynnt væntanlega endurfundi. Munu þau koma saman á næsta ári fyrir „nýja stafræna upplifun,“ að því er fram kemur í frétt Sky News.
Fjóreykið varð heimsfrægt eftir að þau sigruðu Söngvakeppni evrópskra sjónvarpsstöðva árið 1974. Þau hafa ekki komið fram saman á tónleikum síðan 1982.
Hljómsveitin hefur nú tilkynnt samstarf við Simon Fuller sem er lýst sem „byltingarkenndri tilraun sem muni notast við það allra nýjasta í starfrænni tækni í sýndarveruleika.“
Píanóleikarinn Benny Andersson sagði ótakmarkaða möguleika framtíðarinnar fylla hópinn andargift og að þau væri mjög glöð með að fá að taka þátt í því að skapa eitthvað nýtt og dramatískt.
Frekari upplýsingar um verkefnið verða tilkynntar í byrjun næsta árs en bakhjarlar „upplifunarinnar“ segja að hún muni gefa aðdáendum tækifæri til að sjá, heyra og finna fyrir hljómsveitinni á „hátt sem hingað til hefur talist óhugsandi.“