Leikkonan Hilary Duff segist verða fyrir fordómum vegna þess hversu ung hún var þegar hún átti son sinn. Þá segist leikkonan ekki lengur fá hlutverk við hæfi sökum þessa.
Eins og fram kemur í frétt Daily Mail gekk leikkonan í hjónaband þegar hún var 22 ára gömul, en sonur hennar kom í heiminn tveimur árum síðar.
„Mér finnst eins og ég hafi verið dæmd fyrir að hafa átt barn og gift mig of snemma. Nú er mér kastað til hliðar fyrir það eitt að vera móðir,“ sagði leikkonan í sjónvarpsviðtali og benti jafnframt á að málum væri öðruvísi háttað þegar karlmenn ættu í hlut.
„Margar konur í bransanum eiga ekki börn, en eru þó dæmdar fyrir það. Fólk spáir ekki jafn mikið í einkalífi karlmanna og kvenna.“