Leikritið Harry Potter og bölvun barnsins er á leið til Bandaríkjanna. Framleiðendur þess segjast vera langt komnir í viðræðum um uppsetningu á Broadway.
J.K. Rowling, skapari Harry Potter-heimsins, segist vera himinlifandi yfir fréttunum enda sé hópurinn nú einu skrefi nær því að yfirfæra leikritið fyrir uppsetningu á Broadway. Rowling er einn handritshöfundanna ásamt Jack Throne og John Tiffany sem leikstýrir einnig sýningunni í London.
Samkvæmt frétt BBC stendur til að breyta Lyric-leikhúsinu í New York í tengslum við uppsetninguna. Það er eitt stærsta leikhúsið á Broadway en um þessar mundir heldur sirkushópurinn Cirque du Soleil sýningar þar. Sætum í leikhúsinu verður fækkað svo að leikhúsgestir geti upplifað meiri nánd við sýninguna.
Uppselt hefur verið á Harry Potter og bölvun barnsins í London síðan leikritið var frumsýnt í júní síðastliðnum en áætlað er að sýningar á Broadway hefjist árið 2018.