Á sunnudaginn verður glatt á hjalla í Hörpu þegar árlegt Jólakaffi Hringsins verður haldið. Húsið opnar kl. 13 og hefst dagskrá hálftíma síðar.
„Jólakaffið er fastur liður í jólahaldi margra fjölskyldna. Í fyrra tókum við á móti ríflega 900 manns í kaffihlaðborð þar sem allt er heimabakað af Hringskonum. Mikil spenna er í kringum hið víðfræga Jólahappdrætti er fastur liður en vinningar eru rúmlega tvö þúsund. Einnig verða frábær skemmtiatriði og allir listamennirnir gefa vinnu sína,“ segir í fréttatilkynningu Hringskvenna.
Ný gjöf til Landspítala og styrkveitingar 2016
Hringurinn hefur samþykkt að gefa Landspítalanum stoðir sem notaðar eru við aðgerðir á þvag-, kynfærum og endaþarmi 3-6 ára barna. Stoðirnar kosta um 900 þúsund krónur. Stoðirnar eru með hraðklemmum til að festa á skurðarborð. Þær stoðir sem nú eru notaðar eru komnar til ára sinna og ekki hefur fengist fjárveiting til kaupa á nýjum. Upplýsingar um styrkveitingar Hringsins á árinu 2016 má finna á vef félagsins. Það sem af er þessu ári hefur Hringurinn veitt styrki upp á 65 milljónir króna.
Öll verkefni Hringsins eru unnin í sjálfboðaliðastarfi Hringskvenna. Yfirbygging félagsins er engin og allir fjármunir sem safnast renna í Barnaspítalasjóð Hringsins.