Razzie-verðlaunin verða veitt í 37. skiptið 25. febrúar næstkomandi, degi áður en Óskarsverðlaunahátíðin fer fram. Það þykir ekki mikill heiður að hljóta Razzie-verðlaun, enda eru þau svokölluð skammarverðlaun og veitt fyrir verstu frammistöðu í kvikmyndum síðasta árs.
Þar sem árið 2016 þótti ákaflega slæmt hvað kvikmyndir varðar hefur tilnefningum í hverjum flokki verið fjölgað úr fimm í sex.
Nokkrar myndir þykja skara fram úr hvað varðar lítil gæði, til að mynda hlaut Zoolander No. 2 níu tilnefningar, en flokkarnir eru einmitt níu talsins. Batman V Superman: Dawn of Justice hlaut einnig fjölmargar tilnefningar, eða átta talsins.
Meðal annarra voru Ben Stiller, Robert DeNiro og Ben Affleck tilnefndir fyrir versta leik í aðalhlutverki, sem og Megan Fox og Julia Roberts.
Þá keppa sex kvikmyndir um titilinn versta kvikmynd 2016, og má þar nefna Dirty Grandpa, Gods of Egypt, Independence Day: Resurgence, Zoolander No. 2 og Batman V Superman: Dawn of Justice.
Hér má sjá tilnefningarnar í heild sinni.