Flugvél með leikarann Harrison Ford við stjórnvölinn flaug rétt yfir farþegaflugvél með 110 manns um borð áður en hún lenti á flugbraut skammt frá. Litlu munaði að alvarlegt slys hefði orðið. Þetta sést í myndbandi sem var gefið út í dag.
Flugmálayfirvöld í Bandaríkjunum rannsaka atvikið, sem varð 13. febrúar á flugvelli í suðurhluta Kaliforníu, að því er Washington Post greinir frá.
Í myndbandinu sést gul eins hreyfils flugvél Ford fljúga rétt yfir flugvél American Airlines-flugfélagsins, sem færði sig rólega eftir flugbrautinni. Flugvél Ford lendir svo á flugbraut þar sem hún mátti ekki lenda.
Nokkrum mínútum síðar tók farþegaflugvélin á loft.