Söngelsku tvíburarnir sem skipuðu dúettinn Jedward voru hreint ekki ánægðir þegar þeim var meinaður aðgangur að veislu sem haldin var eftir Brit-verðlaunin í gær.
Írsku tónlistarmennirnir gerðu garðinn frægan í Evrópsku söngvakeppninni hér um árið þegar þeir fluttu lagið „Lipstick“. Á dögunum tóku þeir síðan þátt í raunveruleikaþáttunum Celebrity Big Brother.
Afrekin dugðu þó ekki til, enda voru nöfn þeirra ekki á gestalistanum, og fengu þeir þar af leiðandi ekki inngöngu.
„Það fékk enginn inngöngu nema hann væri á gestalistanum og strákarnir voru ekki á honum. Það var því ekki nokkur leið fyrir þá að komast inn. Þeir virtust algerlega miður sín,“ er haft eftir heimildamanni Daily Mail.
Fjöldi stórstjarna var saman kominn á skemmtistaðnum og má þar nefna Ed Sheeran, Emmu Bunton og fyrirsætuna Doutzen Kroes.