Lagið Nótt eftir Svein Rúnar Sigurðsson tekur þátt í úrslitum Söngvakeppni Sjónvarpsins á laugardaginn. Sveinn segir lagið hafa verið samið um hánótt vegna anna, rétt eins og flest önnur lög hans. Sveinn er sprenglærður tónlistarmaður en hann starfar einnig sem yfirlæknir heilsugæslu Akraness.
„Ég kem ekki beint að þessu sjálfur í ár heldur fékk ég fagfólk í hvert hlutverk sem stýrir verkefninu með stakri prýði,“ segir Sveinn í samtali við mbl.is aðspurður um hvernig gangi en hann er m.a. með Valgeir Magnússon, betur þekktan sem Valla sport sem verkefnastjóra. Sveinn segir að hópurinn æfi daglega og að atriðið verði stækkað heilmikið fyrir úrslitakvöldið, þ.e. gefið í með sviðsetninguna.
Lagið Nótt var ekki sérstaklega samið fyrir Söngvakeppni Sjónvarpsins heldur fyrir sænskan listamann en Sveinn semur meira fyrir erlenda listamenn heldur en íslenska. Hann segir að lagið hafi verið samið um hánótt sökum anna. „Ég held reyndar að öll mín lög séu samin milli klukkan 2 og 5 á nóttunni á nærbuxunum,“ segir Sveinn og brosir. „Demóið var hinsvegar sungið af íslenskum söngvara, það kom mjög vel út og þegar ég hafði lokið við textann og útsetninguna fannst mér sem að þetta ætti kannski betur heima í Söngvakeppninni. Úr varð að ég dró lagið til baka úti í Svíþjóð þegar það var valið til þátttöku í söngvakeppninni.“
Aron Hannes Emilsson flytur lagið en hann varð m.a. Jólastjarna Björgvins árið 2011 og hafnaði í 2. sæti í Söngkeppni framhaldsskólanna árið 2015. „Það höfðu margir bent mér á hann,“ segir Sveinn aðspurður um hvernig samstarfið kom til. „Hann hefur verið að vaxa mjög hratt og vel sem listamaður og ætlar sér að vinna við músík. Hann útskrifaðist úr dönskum tónlistarskóla degi áður en ég hafði samband þannig þetta passaði mjög vel. Hann var mjög hrifinn af laginu og það klæðir hann mjög vel.
Sveinn er enginn nýgræðingur í Söngvakeppninni en hann þetta er í 8 skiptið sem hann tekur þátt en alls hefur hann átt 15 lög í keppninni. Aðspurður hvað hann hefur sent mörg lög inn í keppnina segir Sveinn að þau hafi verið 16.
Tvö lög hans hafa unnið keppnina, Heaven og Valentine Lost. Hann segist vera sérstaklega spenntur fyrir möguleikanum á að komast alla leið í aðalkeppnina í Kænugarði í maí þar sem konan hans er frá Úkraínu. „Litli drengurinn okkar Alexander Emil var mér innblástur fyrir þetta lag. Við eigum bókaða ferð til Kænugarðs þessa sömu viku, en það væri gaman að fara að heimsækja tengdaforeldrana sem fulltrúi Íslands í Eurovision."