Ofurfyrirsætan Cindy Crawford er orðin leið á nettröllum sem benda henni á að hún sé að eldast. Hún segist fullfær um að átta sig á því sjálf og við því sé lítið að gera.
„Sá hluti samfélagsins sem vill gagnrýna alla hryggir mig,“ segir hin 51 árs gamla Crawford í samtali við People. Crawford birtir reglulega myndir af sér ómálaðri á samfélagsmiðlum. „Einn af kostunum við að hugsa vel um húðina er að maður þarf ekki að nota jafnmikið af snyrtivörum.“
Þá lætur hún ummæli um að náttúrulegar myndir af henni líkist ekki myndum í tískutímaritum sem vind um eyru þjóta. „Ég vil ekki að fólk sem hitti mig út á götu segi: Vá hún lítur ekkert út eins og á myndum.“