Mynd 1 af 9Hljómsveitin Astron hefur víða spilað í Snæfellsbæ, en ekki hér fyrir sunnan. Hana skipa Trausti Leó Gunnarsson gítarleikari, Lena Hulda Örvarsdóttir söngkona, Jón Grétar Benjamínsson trimmer, Jón Glúmur Hólmgeirsson bassaleikari og Haukur Páll Kristinsson trompet- og gítarleikari. Þau eru sextán til átján ára.
Mynd 2 af 9Hafnfirðingarnir Chase Anton Hjaltested og Oddur Þórisson starfa saman sem Chase. Chase, sem er sautján ára, syngur og Oddur, sem er átján ára, sér um takta. Þeir hafa sent frá ser eitt lag á Spotify, Apple Music og YouTube og stefna á plötu í næsta mánuði.
Mynd 3 af 9Þær Karólína Einarsdóttir, Fríða Björg Pétursdóttir og Hrafnhildur Einarsdóttir skipa rokktríóðið Gróu. Karólína, sem er fjórtán ára, spilar á gítar og hljómborð, Fríða, sem er sextán ára, spilar á bassa og Hrafnhildur , sem er sextán ára, á trommur. Hugmyndin að hljómsveitinni kviknaði á námskeiði hjá Stelpur rokka og þær byrjuðu að spila saman fyrir ári, þo ekki af fullri alvöru fyrr en hálfu ári. Þær eru úr Vesturbænum.
Mynd 4 af 9Hljómsveitin Korter í flog er af höfuðborgarsvæðinu. Kristófer Darri Baldursson leikur á bassa, Örlygur Steinar Arnalds á trommur, Vilhjálmur Svavar Hjálmarsson syngur, Már Jóhannsson leikur á gítar og Björn Heimir Önundarson á hljóðgervil. Þeir eru á aldringum frá 18 til 20 ára og segjast telja að þeir séu að gera einu frumlegu tónlistina á Íslandi í dag undir miklum áhrifum frá kuldarokki, krautrokki og alskonar pönki.
Mynd 5 af 9Árbæjarkvartettinn Kæsingur er rokkað blúsband, skipað 15 til 16 ára krökkum. Bjarki Björnsson leikur á gítar og syngur, Signý Mist Júlíusdóttir leikur á bassa og syngur, Ella Halldórsdóttir leikur á bassa og Eyþór Alexander Sigurvaldsson leikur á trommur. Sveitin hefur starfað frá 2015 og sækir innblástur til rokk og blússveita sjötta og sjöunda áratugsins.
Mynd 6 af 9Síðrokksveitin Misty er frá Höfn í Hornarfirði skipuð þeim Þorkeli Ragnari Grétarssyni og Birki Þór Haukssyni, sem leika á gítara, og Ísari Svan Gautasyni trommuleikara Þorkell og Birkir eru tvítugir, Ísar sautján ára. Þeir hyggjast leyfa alheiminum að sjá inní þeirra dýpstu og myrkustu sálarkima.
Mynd 7 af 9Rappararnir Pálmi Snær Rúnarsson og Agnar Dofri Stefánsson eru úr Breiðholtinu. Pálmi er 22 ára og Agnar 21 árs og segjast hafa byrjað að rappa sem Óboðnir 2008-2009. „Annar okkar hélt áfram á meðan hinn skrifaði bara alltaf, hann sem hélt áfram hefur ekki gefið út lag í tvö ár en hinn hefur gefið út lög á þessum tveimur árum.“
Mynd 8 af 9Systkinin Sjana Rut og Alex Már Jóhannsbörn reka saman sveitina Sjana Rut og NumerusX, Sjana, sem er 18 ára, syngur og Axel, sem er 20 ára, leikur á gítar. Þau segjast hafa glímt við ýmsilegt, en tónlistin hafi bjargað geðheilsu beggja, gert þau nánari og að betri manneskjum. Þau eru úr Grafarvoginum.
Mynd 9 af 9Gabríel Ólafsson er 18 ára píanó og rhodesleikari úr Kópavoginum, en stundar nám á tónlistarbraut MH og rythmískt/klassískt píanónám í Tónlistarskóla FÍH. Hann semur naumhyggjuleg píanóverk sem Svanhildur Lóa Bergsveinsdóttir slagverksleikari, Sverrir Arnórnsson hnéfiðluleikari, Anna Elísabet Sigurðardóttir lágfiðluleikari og Ragnheiður Ingunn Jóhannsdóttir fiðluleikari flytja með honum.
Hljómsveitakeppnin Músíktilraunir hófst í Hörpu á laugardagskvöld og verður fram haldið í kvöld. Síðastliðinn laugardag komust tvær hljómsveitir áfram í úrslit, áheyrendur völdu eina og dómnefnd eina, og á sunnudagskvöld komust tvær til áfram. Fyrstu tvo keppnisdagana voru þátttökusveitir átta, en í kvöld verða þær níu.
Keppnin hefst kl. 19.30 í kvöld.
Hljómsveitirnar sem hreppa efstu sæti keppninnar hljóta hljóðverstíma og ýmislegt annað góss í verðlaun, einnig fá frambærilegir hljóðfæraleikarar viðurkenningar.