Nú styttist heldur betur í Eurovision en keppnin fer fram dagana 9., 11. og 13. maí. Æfingarnar byrja hins vegar á sunnudaginn og núna er sviðið, sem þekur 350 fermetra, tilbúið. Keppnin í ár fer fram í stærðarinnar ráðstefnuhöll í Kænugarði, höfuðborg Úkraínu, sem tekur 7.000 manns í sæti.
Sviðið er 14 metrar að hæð, 70 metrar að breidd og 28 metrar að dýpt. Sviðið er umkringt 1.000 fermetrum af LED-skjám og á sviðinu verða 1.816 ljós, 61 kílómetri af snúrum er notaður bara fyrir ljósin.
Framlag Íslands í keppninni, Svala Björgvinsdóttir með lagið Paper, tekur þátt í fyrri undankeppninni sem fram fer 9. maí. Hún verður þrettánda í röðinni upp á svið.