Þó að það séu bara tveir dagar liðnir frá því að Portúgal vann Eurovision er portúgalska ríkissjónvarpið nú þegar búið að tilkynna að keppnin að ári verði haldin í Lissabon. Þetta var í fyrsta skiptið sem Portúgal vinnur keppnina en landið tók fyrst þátt í keppninni árið 1964.
ESCToday greinir frá þessu og vitnar í frétt á vef portúgalska ríkissjónvarpsins RTP.
Stöðin sendi frá sér fréttatilkynningu í dag þar sem það var staðfest að keppnin færi fram í Lissabon. Þá var einnig greint frá því að mögulega yrði keppnin haldin í MEO-höllinni sem er ein stærsta tónleikahöll Evrópu og getur tekið allt að 20.000 manns. Hún var byggð árið 1998 fyrir heimssýninguna í Lissabon en þá hafa stórir viðburðir verið haldnir þarna síðan, eins og knattspyrnuleikir og stórtónleikar og MTV-verðlaunin 2005.