Söngkonan Cher varð 71 árs á laugardaginn en hún lét það ekki stoppa sig í að koma fram og trylla salinn á Billboard-verðlaunahátíðinni sem fram fór í Las Vegas í gær.
Söngkonan sem tók á móti heiðursverðlaunum tók tvö lög. Annars vegar Believe þar sem hún dansaði um og söng í silfurlituðum hálfgegnsæjum samfestingi og var ekki að sjá á henni að hún væri orðin 71 árs.
Hitt lagið sem Cher tók var If I Could Turn Back Time og kom hún þar fram í svörtum netasamfestingi svipuðum og þeim sem hún var í árið 1989.
„Mig hefur langað til þess að gera þetta síðan ég var fimm ára og ég er búin að vera að þessu í 53 ár. Ég varð 71 árs í gær,“ sagði söngkonan í gærkvöldi þegar hún tók á móti verðlaununum samkvæmt Daily Mail. Hún bætti því síðan við að hún gæti haldið planka í fimm mínútur og uppskar mikinn hlátur.