Raunveruleikastjarnan Kim Kardashian og eiginmaður hennar, rapparinn Kanye West, hafa skrifað undir tæplega 12 milljóna króna samning við staðgöngumóður fyrir þriðja barn þeirra hjóna samkvæmt TMZ.
Hjónin tóku ákvörðun um að ráða staðgöngumóður eftir að Kardashian greindist með viðgróna fylgju sem gerir það að verkum að fylgjan losnar ekki við fæðingu barns og getur valdið lífshættulegri blæðingu fyrir móður.
Fyrsta innborgun hjónanna til staðgöngumóðurinnar verður rúmlega sjö milljónir króna ásamt skilyrðum sem fela í sér meðal annars að móðirin reyki ekki, drekki ekki, sé ekki nálægt kattarsandi, fari ekki í gufubað og borði ekki hráan fisk. Einnig má hún ekki stunda kynlíf 3 vikum fyrir eða eftir óléttuna. Restina af peningunum borga hjónin mánaðarlega í tíu mánuði.
Hjónin eiga nú þegar fjögurra ára dótturina North West og eins árs soninn Saint West.
Snyrtivörulína Kardashian fer í sölu í dag og búist er við hagnaði sem nemur rúmlega milljarði króna á fyrstu mínútunum.