Leikarinn Kit Harington, sem fer með hlutverk Jon Snow í þáttaröðinni Game of Thrones, sá skýr merki um áhrif loftslagsbreytinga á meðan tökum stóð á Íslandi. Hann segir að jökull þar sem tökur fóru fram fyrir fjórum árum hafi augljóslega hopað milli ára.
„Það var kaldhæðnislegt þegar við fórum til Íslands, því að í þáttunum er vetrartíð. Þegar við komum þangað vorum við heppin að fá einhvern snjó vegna þess að í okkar heimi, raunveruleikanum, er svo sannarlega enginn vetur á næsta leiti,“ segir Harington í viðtali við Time. „Við fórum þangað og ég sá að jökullinn þar sem atriðin með okkur Rose [Leslie] voru tekin upp fyrir fjórum árum hafði hopað.“
„Ég sá loftslagsbreytingar og hnattræna hlýnun með mínum eigin augum og það er ekki falleg sjón.“
Loftslagsbreytingar hafa lengi verið þema í þáttaröðinni og taka á sig mynd yfirvofandi vetrartíðar sem ryður sér yfir heiminn úr norðri. Að sögn Haringtons er hins vegar öfugu farið í veruleikanum, þar sem síhækkandi hitastig einkennir vandann.