Það styttist í jólin og komu því um 150 jólasveinar alls staðar að úr heiminum saman á jólasveinaráðstefnu í Bakken í Kaupmannahöfn.
Huffington Post greinir frá því að þetta sé í sextugasta skipti sem ráðstefnan er haldin og létu sveinkarnir ekki góða veðrið trufla sig og klæddust þeir hefðbundnum rauðum búningi og báru hvíta vetrarskeggið.
Nóg er að gera hjá jólasveinunum þessa þrjá daga sem ráðstefnan er haldin. Jólasveinarnir fara í skrúðgöngu, baða sig í sjónum og gæða sér á síld. Einnig eru nokkrir sveinkar sem taka þátt í jólasveinatískusýningu.
Ráðstefnan er ekki eintóm skemmtun en það þarf líka að ræða mikilvæg málefni varðandi jólahaldið. Jólasveinninn Wolfgang frá Þýskalandi segir þá meðal annars hafa rætt um hvaða dagur sé eiginlega jóladagur, en Wolfgang hefur tekið þátt í ráðstefnunni síðan 1996.
Jólasveinninn Elizabeth frá Danmörku segir að þau hafi meðal annars rætt um hvernig jólatré eigi að vera á litinn. „Þetta ár erum við að ákveða hvort tréð eigi að vera fjólublátt, rautt eða grænt...grænn er uppáhaldsliturinn minn,“ segir hún.