„Hún lamdi mig, ég lamdi hana“

Í heimildamyndinni Chris Brown: Welcome to My Life  opnar rapparinn Chris Brown sig um ofbeldissamband sitt og söngkonunnar Rihönnu. En árið 2009 komst sambandið í kastljós fjölmiðla þegar söngkonan gaf skýrslu um ofbeldi sem Brown beitti hana. 

Aðdragandi atviksins var að mati Browns að Rihanna átti erfitt með að treysta honum eftir að hann viðurkenndi að hafa stundað kynlíf með vinnufélaga sínum. „Hún hataði mig eftir það. Eftir það reyndi ég allt. Henni var sama, hún bara treysti mér ekki eftir það,“ sagði Brown og lýsir því að allt hafi farið á niðurleið og þau rifist. „Það voru munnleg rifrildi, líkamleg rifrildi líka.“

Chris Brown opnar sig um sína upplifun á sambandi sínu við Rihönnu í nýrri heimildamynd. mbl.is/AFP

„Ég elska ennþá Rihönnu, en ég verð að vera heiðarlegur, við rifumst, hún lamdi mig, ég lamdi hana en það var aldrei í lagi. Það kom alltaf sá tími að við töluðum um það eins og hvað í andskotanum erum við að gera?“ segir Brown í myndinni. 

Þegar hann ræðir atvikið sem Rihanna gaf skýrslu af segir hann að aðdragandinn hafi verið sá að þau voru stödd í Grammy-verðlaunapartý og í partýinu var einnig umrædd kona sem Brown hafði sofið hjá. Konan kom og heilsaði parinu og það fór ekki vel í Rihönnu. „Ég leit á Rihönnu og hún var organdi, hún var grátandi,“ sagði Brown. 

Í bílnum á leiðinni heim fóru hlutirnir úr böndunum og Brown segir að Rihanna hafi reynt að lemja sig. „En þá lamdi ég hana í alvöru. Með krepptum hnefa, ég kýldi hana og sprengdi vör hennar.“ Brown lýsir því síðan eins og honum haflið liðið eins og skrímsli eftir á. 

• Blogga um frétt