Kenna Cruise um dauða tveggja manna

Fjölskyldur tveggja flugmanna sem létust í flugslysi við tökur á kvikmyndinni American Made saka leikarann Tom Cruise og leikstjórann Doug Liman um vanrækslu sem hafi átt þátt í að draga flugmennina til dauða. Þetta kemur fram í nýjum gögnum sem lögð hafa verið fyrir dóm vestanhafs samkvæmt People. 

Flugmennirnir Alan Purwin og Carlos Berl létust í september 2015 við tökur en þriðji flugmaðurinn lamaðist í slysinu. Fjölskyldur hinna látnu hafa stefnt framleiðendum myndarinnar, Entertainment, Vendian Entertainment og Cross Creek Pictures. Í gögnunum er einn framleiðendanna sagður hafa kvartað undan framferði Cruise og Limans sem eru sagðir hafa búið til ný og stórhættuleg flugáhættuatriði við upptökur á myndinni.

Þá er skortur á skipulagningu sagður hafa valdið því að óundirbúnir flugmenn án leyfis í gamalli flugvél hafi farið verið látnir fljúga í vondu veðri á meðal fjalla sem þeir þekktu ekki.

Fjölskyldur flugmannanna hafa einnig stefnt hvor annarri og þá hefur fjölskylda Berls einnig stefnt þriðja flugmanninum, sem lifði slysið af.

Tom Cruise. mbl.is/AFP

• Blogga um frétt