Liam Gallagher, tónlistarmaður og söngvari hinnar goðsagnakenndu hljómsveitar Oasis, er greinilega afar leyndardómsfullur maður.
Vefmiðillinn Mirror greindi frá því í dag að söngvarinn, sem hefur ekki verið kallaður annað en Liam síðan á tíunda áratug síðustu aldar, beri í raun og veru allt annað nafn.
Aðdáendur hafa margir hverjir bent á að raunverulegt nafn kappans, sem honum var gefið í æsku, skori síður en svo mörg rokkstig. Þá greindi vefmiðillinn frá því að söngvarinn héti í raun og veru William John Paul Gallagher.
Miklar umræður spunnust um málið í netheimum og voru margir aðdáendur furðu lostnir.
„William Gallagher, það er aðeins minna rokk í því en Liam Gallagher,“ sagði einn aðdáandi.
„Liam Gallagher heitir í raun og veru William Gallagher og allt líf mitt er eintóm lygi,“ sagði annar.
Sumum þótti stóra nafnamálið þó beinlínis stormur í vatnsglasi.
„Ef þið vitið ekki að Liam er stytting á William eigið þið við stærra vandamál að etja.“