Lárus Örn Arnarson hefur búið í Los Angeles síðan hann lauk þar tónlistarnámi í Musicians Institute. Nýverið kom út lagið My Name (say it) með hljómsveitinni Citizen Four sem Lárus vann að með Rodney Jerkins. Lagið er ný útgáfa af Say My Name með Destiny's Child en Jerkins var einmitt í upprunalega höfundarteyminu.
„Ég hef unnið að tveimur lögum með Rodney Jerkins en eitt af þeim hefur bara komið út,“ segir Lárus og segir það mikinn heiður að fá að vinna með Jerkins enda hafi hann verið mikill aðdáandi hans lengi. „Hann pródusaði eitt af mínum uppáhalds lögum með Michael Jackson sem er You Rock My World,“ segir Lárus.
Svo skemmtilega vildi til að Kelly Rowland sem var í Destiny's Child ásamt þeim Beyoncé og Michelle Williams var í næsta hljóðveri við Lárus og félaga þegar upptökurnar fóru fram. „Við spjölluðum aðeins við hana þegar við vorum frammi og henni fannst það geggjað að þeir væru að endurgera lagið,“ segir Lárus.
Citizen Four er nýtt strákaband með samning hjá Island Records en Lárus segir útgáfufyrirtækið vera eitt það stærsta heiminum. „Þeir eru mjög hæfileikaríkir og ná vonandi langt,“ segir Lárus.