Fillipus prins fylgist ekki með hvernig líf hans og Elísabetar Englandsdrottningar er túlkað á sjónvarpsskjánum í þáttaröðinni The Crown eða Krúnunni ef marka má orð Matt Smith sem fer einmitt með hlutverk Fillipusar í þáttunum.
Matt Smith var í viðtali við The Guardian á dögunum í tilefni þess að önnur þáttaröðin var frumsýnd á Netflix fyrir helgi. Þar segir hann sögu þegar félagi hans var í kvöldverðarboði hjá drottningu og sat við hliðina á Fillupusi.
Smith segir að Fillipus hafi spurt félaga sinn að því hvort hann kæmi eitthvað að gerð The Crown. Félaginn neitaði því en gat þó ekki sleppt því þegar leið á kvöldið að spyrja prinsinn að því hvort hann fylgdist með þáttunum. „Láttu ekki eins og fífl,“ á Fillipus að hafa svarað.
Smith lofar því ekki að sagan sé alsönn en lýsir aðdáun sinni á prinsinum. Hann kann að meta það í fari hans að hann geri það sem hann vilji, þegar hann vilji, með þeim sem hann vill.