Veröld/Fólk | Veraldarfréttir | mbl | 1.6.2008 | 11:10

Fær bætur vegna of margra Þjóðverja

Bresk ferðaskrifstofa hefur verið dæmd til að greiða breskum ferðamanni bætur vegna þess að of margir Þjóðverjar voru á hóteli í Grikklandi þar sem Bretinn dvaldist með fjölskyldu sinni.

Bretinn, sem heitir David Barnish og er 47 ára, greiddi 4 þúsund pund, jafnvirði nærri 600 þúsunda króna, fyrir ferð til Kos í Griklandi í ágúst í fyrra. Barnish dvaldi þar á hóteli ásamt konu sinni og þremur dætrum en fjölskyldan gat ekki tekið þátt í neinum fjölskyldu- eða barnaskemmtunum á vegum hótelsins vegna þess að þær fóru allar fram á þýsku.

Barnish stefndi ferðaskrifstofunni Thomson fyrir samningsbrot og sagði að skrifstofan hefði ekki upplýst, að Grecotel Park hótelið væri nánast eingöngu notað af þýskum ferðamönnum.

Dómstóll í Stoke dæmdi að Barnish ætti rétt á 750 punda bótum, jafnvirði rúmlega 110 þúsund króna. Taldi dómarinn, að viðskiptavinir sem fengju upplýsingar um hótel í enskum bæklingi ættu rétt á að fá þjónustu á sínu tungumáli.

Barnish sagði við bresk dagblöð eftir að dómurinn var kveðinn upp, að hann hafi ekkert á móti Þjóðverjum. Hins vegar hefði ekki komið fram í auglýsingabæklingunum, að öll þjónusta á hótelinu var sniðin að þýskumælandi gestum. Um 700 gestir hefðu verið á hótelinu og þar af hefðu aðeins um 25 verið enskir.

Talsmaður Thomson sagði í yfirlýsingu: „Okkur þykir leitt, að hr. Barnish hafi ekki fengið þá skemmtun á hótelinu sem hann bjóst við."