Ekkjan lést á leið í kirkjugarðinn

Brasilíska lögreglan hefur greint frá því að ekkja sem var á leið í kirkjugarðinn með kistu eiginmannsins hafi látist þegar líkbifreiðin sem hún var í lenti í umferðaróhappi. Við höggið hafi kistan kastast aftan á háls hennar með þeim afleiðingum að hún lést.

Að sögn lögreglu var ekkjan, Marciana Silva Barcelos, 67 ára, í framsæti bifreiðarinnar þegar slysið átti sér stað í héraðinu  Rio Grande do Sul í gær. Hún lést samstundis. Bílstjóri líkbílsins og sonur Barcelos-hjónanna, slösuðust lítillega við áreksturinn.

Eiginmaður hennar, Josi Silveira Coimbra, 76 ára, lést á sunnudag úr hjartaáfalli í miðri veislu.