Áhyggjufullur flugmaður bað farþegana um að biðja
Setja bókamerki
Íranskur flugmaður varð mjög áhyggjufullur þegar tæknibilun kom upp í flugi í gær. Flugmaðurinn brást við með því að segja farþegunum frá vandamálinu og í framhaldinu bað hann þá um að leggjast á bæn.
Eftir um sex klukkutíma töf á flugvellinum í Teheran í Íran tókst Boeing-vél flugfélagsins Aseman loks á loft. Hún varð hins vegar að snúa aftur vegna bilunar í tæknibúnaði. Þetta hefur íranska fréttastofan ISNA eftir einum flugfarþeganna.
Hann segir að vélin hafi hafið sig flugs kl. 00:15 að staðartíma og hafi orðið að lenda aftur á vellinum um 45 mínútum síðar.
Farþeginn segir að flugstjórinn hafi sagt við farþegana að vegna tæknilegrar bilunar hefði vélin orðið að snúa við. „Vinsamlegast biðjið,“ á flugstjórinn svo að hafa sagt.
Refsiaðgerðir og viðskiptaþvinganir hafa í áraraðir hamlað því að Íranir geti endurnýjað flugvélaflotann sinn, eða keypt varahluti í gamlar vélar. Því hafa fjölmörg alvarleg flugslys orðið í landinu undanfarinn áratug.
Bæði farþegavélar og herþotur landsins eru orðnar mjög gamlar og margar í mjög lélegu ásigkomulagi, ekki síst vegna viðhaldsleysis.
Eitt af verstu flugslysum í sögu landsins varð í júlí sl. þegar vél Caspian flugfélagsins fórst nærri Qazvin, sem er norðvestur af Teheran. Þá létust allir 168 um borð. Vélin var rússnesk af gerðinni Tupolev 154.
Moses Hightower og Prins Póló gefa út eyjalag
Myndir: Reynir við heimsmet í Hlíðarfjalli í dag
Baldur: „Ég ætla að svara þessu kalli“
Segir nýtt frumvarp gefa eldisfyrirtækjum auðlindir
Búið að bólusetja börn alla helgina
Bifreið ekið á skrifstofu Útlendingastofnunar
Sáttur við sína stöðu og finnur fyrir meðbyr
„Mér finnst Halla Hrund svona Vigdísarleg“