Nýtt typpi í boði Berlusconi

Rómversk stytta af guðinum Mars, sem prýðir skrifstofu Silvio Berlusconi forsætisráðherra Ítalíu, hefur verið gerð upp. Styttan skartar m.a. glænýju typpi og var það sett á samkvæmt sérstökum fyrirmælum forsætisráðherrans.

Marmarastyttan af Mars, stríðsguði Rómverja, og ástargyðjunni Venusi, var gerð á annarri öld eftir Krist. Viðgerðin kostaði 70.000 evrur (10,8 milljónir kr.) og voru hefðbundnar aðferðir við viðgerð slíkra forngripa ekki í heiðri hafðar, að sögn dagblaðsins La Repubblica.

Viðgerðin fór fram samkvæmt skýrum skipunum forsætisráðherrans, að sögn dagblaðsins. Auk þess að endurgera manndóm Mars var einnig bætt á hann hendi og Venus fékk líka nýja hendi. 

Typpi voru oft brotin af rómverskum styttum og þóttu þau eftirsóttir minjagripir. Einnig voru dæmi þess að styttur væru limlestar - í bókstaflegri merkingu - til að þær særðu síður sómakennd siðprúðra borgara.

Marmarastyttunni var komið fyrir í Chigi höll í Róm í febrúar síðastliðnum. Gert var við styttuna og settar á hendur sem vantaði og typpið umtalaða. Reuters

Marmarastyttan af "Venusi og Mars" var til sýnis í Chigi höllinni í Róm í dag. Styttan fannst 1918 og þá vantaði ýmsa líkamsparta á rómversku guðina. Reuters

• 3 blogg um fréttina

Bloggað um fréttina

• Sigurður Haraldsson: Þetta hefur verið ömurlegt.
• Ólafur Ragnarsson: "Maður ætti kannske "
• Axel Jóhann Hallgrímsson: Nýjar fornminjar