Forstjóri sænskrar leigubílastöðvar hefur verið rekinn fyrir að senda starfsmönnum sínum rafrænt jólakort með dónalegri kveðju og mynd af konum í nærfötum.
Steffan Pettersson, framkvæmdastjóri leigubílastöðvar í Örebro, sendi starfsfólki stöðvarinnar rafrænt jólakort með mynd af neðri hluta þriggja kvenna í nærfötum. Að sögn blaðsins Nerikes Allehanda sagðist Pettersson hafa fengið þrjár konur, sem vinna á skiptiborði stöðvarinnar, til að sitja fyrir og starfsmenn gætu getið upp á hver væri hver á myndinni.
„Rétta svarið verður verðlaunað á næsta starfsmannafundi," sagði í jólakortinu.
Nokkrir starfsmenn og fjölskyldur kvennanna þriggja tóku þetta óstinnt upp og kvörtuðu við stjórn fyrirtækisins. Stjórnin tók ákvörðun um að segja Pettersson upp án tafar og hefur blaðið eftir stjórnarformanninum, að ekki sé hægt að líða kynferðislega áreitni af þessu tagi.