13 ára fangelsi fyrir að skera undan ástmanninum

Franskur karlmaður hefur verið dæmdur í 13 ára fangelsi fyrir að hafa skorið undan ástmanni barnsmóður sinnar og sturtað svo kynfærum hans niður í klósettið. Hann sagði við réttarhöldin að óþægileg þögn hefði verið á meðan þeir biðu eftir sjúkrabílnum.

Blaise Fragione, 38 ára, hefur viðurkennt að hafa í október 2008 rotað fórnarlambið, sem nefndur er F í frönskum fjölmiðlum, skorið undan honum með rakhníf og hent kynfærum hans í klósettið.

Fragione segist hafa orðið hamstola af bræði eftir að F greindi honum frá því að hann ætti í ástarsambandi við fyrrverandi sambýliskonu Fragiones til fjórtán ára og móður tveggja barna hans.

Lögmaður Fragiones, Marc Ceccaldi, segir að skjólstæðingur sinn hafi misst alla dómgreind við þessar fréttir en geri sér grein fyrir þeim glæp sem hann framdi í stundaræði. Fragione á yfir höfði sér allt að fimmtán ára fangelsi.

F segir að Fragione hafi bundið hann og síðan limlest. Lögfræðingur F segir að Fragione hafi gjörsamlega eyðilagt líf F með gjörðum sínum. Eftir árásina er limur F ekki nema 3 cm að lengd en sé 5 cm í fullri reisn. Hann er nú á biðlista yfir lýtaaðgerð.

Fragione og konan hafa hins vegar tekið upp samband á ný og eru að undirbúa brúðkaup sitt.

• 2 blogg um fréttina

Bloggað um fréttina

• Guðmundur Júlíusson: 13 ára fangelsi fyrir að skera undan ástmanninum
• Húsmóðir: Hvað er að skera undan mamma ?