24 ára maður sem lögreglan í North Carolina leitaði að fyrir innbrot mætti í kleinuhringjaátskeppni og sigraði sömu löggur og leituðu hans. Consumerist greinir frá þessu.
Maðurinn rændi nokkrar matvöruverslanir í nóvember í fyrra og hafði verið eftirlýstur af lögreglu síðan. Hann mætti svo líkt og þruma úr heiðskíru lofti á góðgerðarviðburðinn Night Out, sem skipulagður er af lögreglunni og slökkviliðinu í bænum Elizabeth City.
Á viðburðinum gátu bæjarbúar reynt sig við lögreglumenn í kleinuhringjaátskeppni, en keppnin gekk út á að borða sem flesta kleinuhringi á tveimur mínútum. Hinn grunaði tróð í sig átta hringjum á tímanum og sigraði keppnina.
Þegar heim var komið áttuðu lögreglumennirnir hver hafði lagt þá af velli þegar sagt var frá keppninni í dagblöðum.
„Þegar ég las fréttirnar varð ég mjög pirraður enda fannst mér hann vera að klína þessu framan í okkur. Við höfum leitað hans í marga mánuði. En ég óskaði honum samt til hamingju. Hann getur borðað mikið af kleinuhringjum. Gott hjá honum,“ sagði súr lögregluþjónn.
Maðurinn var handtekinn stuttu síðar og ákærður fyrir innbrot og eignatjón.