Bandarískir embættismenn telja að Saddam Hussein, fyrrum forseti Íraks, og synir hans tveir séu enn á lífi. Fyrrum háttsettur íraskur embættismaður segist hafa flúið til Sýrlands ásamt sonum Saddams eftir að herir Bandaríkjamanna, Breta og fleiri þjóða réðust inn í Írak. Þeir þrír hafi hins vegar farið aftur til Íraks eftir að Sýrlendingar ráku þá úr landi. Bandarísk dagblöð hafa þetta eftir embættismönnum í bandaríska varnarmálaráðuneytinu.

Abid Hamid Mahmud al-Tikriti, sem handtekinn var í Írak í vikunni, sagði Bandaríkjamönnum að hann hefði verið hjá Saddam Hussein ásamt sonum Saddams, Uday og Qusay, þegar stríðið hófst en hópurinn hefði síðan tvístrast. Al-Tikriti, Uday og Qusay hafi flúið til Sýrlands en þeim var síðan vísað úr landi.

Blöðin Washington Post og New York Times hafa þetta eftir embættismönnum í dag sem segja jafnframt að þessar upplýsingar séu enn óstaðfestar. En upplýsingar sem bandarískir leyniþjónustumenn hafa nýlega fengið benda til þess að Saddam og synir hans séu á lífi í Írak og hefur leit að þeim verið hert.

Mahmud al-Tikriti, einn af helstu aðstoðarmönnum Saddams, var handtekinn í Írak fyrr í vikunni og hefur síðan verið í stöðugum yfirheyrslum hjá bandarískum embættismönnum í Bagdad. New York Times hefur eftir háttsettum embættismanni að al-Tikriti geti veitt mjög mikilvægar upplýsingar en jafnframt fari menn varlega í að trúa öllu sem hann segi í ljósi langrar hefðar innan íraska stjórnkerfisins að blekkja og veita rangar upplýsingar.