Saddam Hussein, fyrrum forseti Íraks, er í felum norður af Bagdad ásamt Ali Hassan al-Majid, einum helsta vopnabróður sínum, sem nefndur hefur verið Efnavopna-Alí. Þetta segir Wafiq al-Samarrai, fyrrum yfirmaður leyniþjónustu Íraks í samtali við blaðið Independent í dag.

Blaðið hefur eftir hershöfðingjanum að Saddam og Ali haldi sig á 60 km löngu og 20 km breiðu svæði milli Bagdad og borgarinnar Samara á bökkum Tígrisfljóts þar sem fjöldi lítilla þorpa og bóndabæja séu. Þetta geri þeim auðvelt um vik að fela sig þar sem mjög þéttbýlt sé þar og einnig mikill gróður.

Þótt Bandaríkjamenn hafi sett jafnvirði rúmlega 1,8 milljarða króna til höfuðs Saddams hefur honum tekist að komast hjá handtöku til þessa.

Ali Hassan al-Majid hefur verið kallaður Efnavopna-Alí fyrir að fyrirskipa að eiturgasi skyldi beitt gegn Kúrdum á síðasta áratug. Fullyrt var um tíma að hann hefði látið lífið meðan á Íraksstríðinu stóð en síðan hafa komið fram vísbendingar um að hann sé á lífi.

Samarrai veitir bandarískum hersveitum aðstoð við leitina að Saddam. Segir hann forsetann fyrrverandi hafa fyrirskipað sprengjuárás á hús sitt fyrir 10 dögum.

Samrarri segir að þótt takist að hafa hendur í hári Saddams muni skæruhernaður gegn bandarískum hermönnum í Írak ekki stöðvast. Flestar árásirnar séu af völdum íslamskra hópa og fyrrum stríðsmanna sem ekki fái lengur laun, og fyrrum félögum í Baath-flokki Saddams.