Saddam Hussein, fyrrum forseti Íraks, hefur verið í felum í heimaborg sinni, Tikrit, og er talinn hafa beitt áhrifum sínum innan andspyrnuhreyfingarinnar sem staðið hefur fyrir árásum á bandaríska hermenn á síðustu mánuðum. Svo tíðar eru þessar árásir að nærri lagi að bandarískur hermaður hafi fallið annan hvern dag að undanförnu. Síðast lét bandarískur hermaður lífið í morgun og tveir særðust þegar handsprengjuárás var gerð á herflokk sem var á eftirlitsferð í miðborg Tikrit.

„Við höfum fengið öruggar vísbendingar um að Saddam hefur verið hér nýlega," sagði Troy Smith, yfirmaður í Bandaríkjaher. „Hann kann að vera hér núna en að minnsta kosti eru áhrif hans mikil á svæðinu," sagði Smith.

Saddam fæddist í þorpi við útjaðar Tikrit. Hann sást síðast opinberlega í Bagdad í byrjun apríl í þann mund sem borgin féll í hendur Bandaríkjamanna. Synir hans tveir, Uday og Qusai, féllu í skotbardaga við bandaríska hermenn 22. júlí í borginni Mosul. Saddam hefur nokkrum sinnum lesið ávörp inn á segulbandsspólur sem arabískar sjónvarpstöðvar hafa síðan leikið.

Smith vildi ekki upplýsa hvers eðlis þær upplýsingar væru sem Bandaríkjamenn hefðu um Saddam en sagði að þær væru áreiðanlegar. „Hvert hefði hann átt að fara," sagði Smith. „Fjölskylda hans er hér og hér eru rætur hans."

Smith sagði að samverkamenn Saddams, sem enn ganga lausir, gætu verið í Tikrit eða nágrenni. Af 55 Írökum, sem Bandaríkjamenn lýstu eftir, eru 38 í haldi Bandaríkjamanna, þrír eru látnir eða taldir látnir en 14 ganga enn lausir.

„Við höldum að þeir séu enn hér," sagði Smith. „Þeir ráða greinilega yfir fé til að greiða venjulegum fátækum Íraka fyrir að skjóta á herflokka bandalagsríkjanna... Við teljum að við eigum í höggi við mjög fáa einstaklinga," sagði Smith.

Talið er að helstu stuðningsmenn Saddams og félagar úr Fedayeen-bardagasveitunum, fjármagni og skipuleggi árásirnar á Bandaríkjamenn.